Madrid, 24 de xaneiro de 2011. - O xornalista lucense Miguel Cabana falou hoxe na Casa de Galicia en Madrid de "unha primicia, pois é algo do que ata hoxe, moi poucas persoas teñen coñecemento", dixo. Ademais de datos históricos xa coñecidos, Cabana tivo acceso, en exclusiva, a testemuños reais de pilotos alemáns que clandestinamente voaban dende Galicia en avións facilitados pola administración de Franco para "espiar" ás frotas aliadas no Atlántico na II Guerra Mundial".

A presentación do acto correu a cargo do delegado da Xunta de Galicia en Madrid e director da Casa de Galicia, José Ramón Ónega López e contou coa asistencia de preto dun centenar de persoas, entre elas tres deputados galegos: os lucenses Joaquín Díez e Margarita Pérez Herráez e Alberto Fidalgo pola provincia de Ourense. Na súa intervención, Ónega destacou a traxectoria profesional do relator; "entrou en La Voz de Galicia no ano 1994, onde foi redactor con diferentes responsabilidades e en diferentes centros de traballo e actualmente é delegado da devandita cabeceira en Lugo,".

Miguel Cabana proxectou a foto do piloto alemán Schoffer: Preséntoos ao señor Schoffer. Agora ten 91 anos, e voou durante a II GM en Galicia, oculto baixo aparencia dun civil xunto a outros compañeiros coma se fosen civís españois sobre o Atlántico e o Cantábrico para encontrar os convois de barcos aliados e dar a súa posición aos submarinos alemáns". Os repostajes e escalas dos submarinos alemáns na ría de Vigo, son datos coñecidos pero non estes. Schoffer, xunto con varios compañeiros vivían en 1943 en Lugo, unha cidade pequena, discreta e afastada de controis. Dúas veces por semana, en parellas, viaxaban a Santiago e dende alí, internábanse no mar pilotando pequenos avións, ata divisar un obxectivo. Sen variar o rumbo, seguían unha hora máis, daban a volta e trazaban un triángulo. Con estes datos, volvían ao hotel e dende alí, co sofisticado sistema de Consol desenvolvido por Kramar e Goldman e do que había dous centros en España, en Sevilla e o de Lugo, podían enviar mensaxes cifradas coa posición exacta da nave, rumbo, velocidade, características... Unha precisión que permitía aos submarinos alemáns que poucos barcos saíran indemnes, -afundiron máis de 2800-. Cabana lamentou que as instalacións non chegasen aos nosos días, como en Suecia, onde unha estación similar, foi declarada Patrimonio da Humanidade e é un Museo.